夠啦..
已經改過N次
點改都好都唔會arm當前既我既心水
D睇法變得太快
而家post出黎
當係留一個snapshot
話比將來既自己知
自己曾經咁樣看待過自己既大學生活
＝＝＝＝
大學回顧
揀大學
起史勿夫手上接過cert，見到蘋果香蕉，一隻貓同兩隻狗。雖然唔係幾滿意蘋果香蕉貓既位置，不過而家唔係賭馬買place...總之有就得啦...如果多隻貓我就唔會改豬拔屎既選擇，小弟當年比雙學位吸引住，為左要多個學位連馬料水大學既宿舍都唔住，將1st choice改成薄扶林大學。
呢個決定，無話好定唔好既。無得話如果去左馬料水大學就會點點點。沒有如果
揀科
07年頭左右應該鎖定左computer engineering呢科。不過呢，如果再揀過，purely base on course content既話我諗我會揀computer science...作為一個土生土長，將來都諗住起香港打工既香港人，讀咁多hardware野真係唔知為乜，況且computer science又唔係果方面既course讀...
當年click 入EEE個網頁，見到CE core有一科叫做”ELEC 2401 Computer Architecture”，個名幾型棍！Architecture wor!!「我唔單止係工程師，仲係建築師！！」可惜果時我無click 入CS 既網頁睇，原來CS都有同一個 course=.=...
起北大讀左「計算機組織與體系結構」即係HKU既ELEC2401，係幾有趣既，讀下電腦點樣執指令。只不過讀呢個course既條件，係要讀多10個EEE既courses...代價太大喇...
比一個course name吸引左，係咪好幼稚？有D啦，中學雞係要有D幻想。君不見每年有幾多個中學雞對CS既Game Design趨之若鶩...
有另一major更加好者，唔代表呢個major唔好既。小弟能力有限，環觀成間大學咁多major, 除左CS之外睇怕都無第二個major更加suit小弟喇。CE既course讀起上黎尚算得心應手。
Finance，07年得2月左右？薄扶林大學同馬料水大學先後宣佈開辦n展/必屎 programme...小弟仲係中學雞既時候都迷惘過，「讀必屎好有前途？」。
前途，呢兩個字唔知影響左幾多中學雞揀科。小弟因為呢兩個字無揀到physics / chem...小弟知必屎唔係我杯茶，所以豬拔屎list入面無乜必屎科...
薄扶林／馬料水大學既dual degree programme好在3+1既形式修讀，讀到第3年拎左engine degree之後，覺得夠喇，可以quit。唔似得火雞大學捆綁式，無得唔要第二個學位。
話說薄扶林大學第一屆BEng/BBA學生intake左20個左右，到第4年...只係淨番...8個...小弟認為箇中原因係...正宗既engine仔女...係接受唔到business咁廢既教學模式，搵到好工既點解唔走？
不過捆綁式都有捆綁既好，more integrated。小弟聽過一位火雞同學講，佢地既dual degree係培養有managerial skill既engineer, 唔似得敝校將兩樣無關係既野擺埋一齊...
講遠左添。解決興趣VS前途呢個迷思既最佳方法係咩？本黎係魚與熊掌，dual degree令我兩者兼得，有乜理由唔要先？代價只係讀多一年（雖然結果多左年半...），好抵丫！
同學
上面講到好似有DD後悔揀左CE咁，果個係從course content層面黎講。遇到一班咁好既同學，果DD後悔就唔再係問題。我都幾夠膽講對上三屆對落三屆，無一屆CE及得上我地07 intake！（注：梗係啦三屆前係04年，IT谷底）（注二：過多幾屆之後都唔知仲有無人揀CE...）
07既CE同學真係犀利到非常。有成7個人，over 三分之一既同學拎first hon！咁多first hon唔係偶然，CE真係有好多叻人～有Geomancer有熊仔有Sixteen Slithereen Guard...(sor Dota上腦添)應該話...有ACM Instructor有Year 2就入iBank做intern有PhD
而且CE同學讀書風氣真係好好：有咩assignment唔識做就齊齊起.NET研究；有咩source就大家分享；有書一齊溫；而且好自律：溫兩個鐘頭書打一鋪Dota
起度真係要多謝下Bryan...無左Bryan呢...1614都唔知點算...IP又唔知點算...0250有D programming assignment我都係msn問Bryan先識做...
同埋...會對而家番緊既industry有所認識，都係由同學開始。如果無咁多猛料起附近幫手指導下小弟...小弟可能...去左第二度番工lu...
呢班大學同學，邊度搵呀。
揀(Computer science) courses
同讀緊書既同學講句，揀course真係要揀D教theory既course... Practical既野自己學就得，除非你渣到無能力自學啦。（又不過，如果無能力自學，咁你都唔arm做IT industry...）
上莊
上行社真係我大學4.5年入面做得最arm既事。
我個facebook add左三百幾個fd, 入面起碼五分一係行社既人。Year 3之後我仍然覺得大學生活係多姿多彩，都係因為行社。
想當日同膠津一齊行reg day, 行過zone 3, ICA屬會地帶...
見到行社counter。當周圍既嫂都落足力哎...唯獨是行社個counter靜到...直情唔覺有人起度。偏偏我就行左黎呢個counter度，望到張o camp poster...心諗「露營？arm我wor」
「er...唔該，我想報名架（無人應...）唔該...唔該！」
無記錯既話，果時守緊counter既係阿軒同crystal。
「啊...想報名？請等等我繽粉樂緊...」
阿軒搵左好耐先搵到張application form比我
印象中果時行社既宣傳同其他嫂比，真係有D距離。填完application form之後有少少覺得...會唔會中左伏？
去左行社O camp, ramblers’ festival既夜行大東山...（注：44莊因human resource不足，無舉辦到ramblers’ mission，改為leisure 為主既ramblers’ festival...同樣係一trip一camp...不過個camp最後太少人報名所以搞唔成）
老老實實，44莊既function...一般般啦...O camp第2日朝頭早仲因為落雨而提早出營。
講到咁麻麻，咁你又上行社支莊？當年小弟的確係有考慮過其他...有兩個中同都上左天文嫂，的確有D吸引。不過小弟又無參加過天文嫂既活動（其實係驚天文嫂chur得濟）...另外，HKU仲有個鮮為人知既劍擊學會...話說小弟當年都上過佢個初班架，仲上左六堂添！我仲曾經諗過玩落去，玩到入U team!!玩到入港隊！！...（消音中）
入U之前已經諗過，上莊住hall要二擇其一。因為橙hall 1st round唔收，九月既時候立志要上莊。
十月傾莊。上咩post好呢？我呢D小薯唔適合做大位架喇...原本係揀steward既，小弟做過幾年童軍，對gears有一定程度熟識。點知上莊主席講講下講到...「其實仲有幾個posts既，例如info sec管下地圖，programe sec諗下programe」，「管下地圖」4個字辣著左我。小弟自中學開始鍾意拎住本街道圖猛咁睇，對地圖有D興趣。問清楚info sec既responsibility之後就填左呢個做1st choice...當然，唔會有人同我爭呢個post啦。
所謂「問清楚info sec既responsibility」其實係呃人既，因為上莊都唔係好清楚info sec 要做乜。鑑於傾莊後期小弟知道有橙hall住，當時行社store room又起小弟樓下，上莊前已經講明小弟其實都係半個steward...輔助下另外兩位stewards。
另外小弟仲揀左個day trip PIC黎做。原本係去大帽山既...不過揀route既時候唔知有咩criteria，同上莊pre左次trip之後比人插到暈低...都未知死，照放落year plan度，結果...當然係campaign果陣比人ban...
當年既AGM真係幾灰，compare with近幾莊我諗45既year plan應該係最屎果個。
一：無RM，year plan都係得ramblers’ festival...camp上莊問佢地點解無左RM既時候，見到佢地比人鬧到就死咁濟...丁主席拿拿聲傳紙仔比我地問邊個肯做RM PIC... RM呢個function係campaign途中加落去既...
二：小弟個function路線totally banned...要重新規劃過
三：亮哥既「人坐，我行，行上昂平360」比人恥笑到...簡直係慘不忍睹。 要重新規劃過
四：原本想同中國教育小組合辦赤足行，懶勁咁搞個joint function...最終都係收左皮。五：山藝二級課程都比人鬧...sem 1得4個function入面有3個都係外判（山藝一，乘風航，山藝二）。「行社淨係搞外判function ja mei?」最終山藝二都係收左皮
year plan入面有邊個function係完整過關？山藝一，I day, O camp, informal trip lor。無喇。所以我認真地覺得行社近幾莊係好犀架喇。借用阿4某次AGM既comment：「呢份year plan...好似去得架啦wor」
唔...講左去行社既歴史添...都係講番自已
小弟對行社係有種commitment, 呢種commitment我都唔知係黎自邊度。可能係小弟有D懶，有D似藤蔓植物，一旦依附起某事物上，就唔係好願意重新search其他野。點都好啦，小弟在港期間，真係100%去曬d pre-trip。可以出現既莊function都應該出現曬。
小弟做PIC個function...勇闖高峰，由原本大帽山轉為蚺蛇尖，自問個function幾成功丫，至少無人碌左落山...係有兩位著住boots黎行山既女同學話要提早走，由上莊接走既時候好似盪失左路...
雖然係好有commitment...神推鬼ong既情況下竟然去左成年exchange, 搞到有year 2 sem 1既莊期唔起度
「其實我都唔知點解我會報到exchange，我又唔係報world wide，報埋D唔知乜鬼programme，我果時連application form都無填好，真係好好彩咁比我去到呢個exchange。咁我初時又以為一定要去一年，點知到臨去北大之前先知係去半年都得…（全場愕然）我都知，起度同我既莊友講幾多句對唔住都…補唔番…」
（45莊落莊後sharing session講既...）
關於點樣去到exchange，遲D先講。總之就因為個exchange programme, 我2008 Sept 16離開左香港，最緊要既O camp / RM都幫唔到手，成為莊期內最大既遺憾。真係唔好意思，45莊sharing session既第一滴眼淚係我必出黎既。
小弟去exchange去左足足一年，所以下莊頭半年既function我都去唔到。只係起番黎香港過年果個月去過pretrip...果時同下莊識左短短一個月，唔知點解佢地已經好到整張卡farewell我。真係幾感動呀...2009 Jun 18番黎香港之後，有一半係繼續我對行社既commitment，有一半係覺得欠左行社，所以係咁出席下莊既functions。小弟有一晚起msn tagline自嘲為45.5莊，曾經成為一時佳話架=p
莊友莊友，其實莊內莊外都係密友。2010年頭同debby / ringo / lala去左一個禮拜黃山旅行，勁開心，真係勁開心。exchange果陣去旅行，旅行感唔係好強烈，因為去既地方距離北京都唔係好遠，而且都係好北京feel。番黎香港再去旅行，而且係去一個禮拜咁長...又咁random, 由深渡搭村巴去歙縣真係好有電波少年feel，4個人逼埋一間房忽然間停電，深夜sharing時段，比人踢左落床等等等等我都仲記得好清楚...仲因為呢個旅行而撮合一段姻緣，哈哈哈哈真係好值得回味～！
仲有中山三莊之旅、澳門、三人歐洲grad trip、長咀觀日、四登蚺蛇尖、三次灣仔露營、兩次東龍島露營、九龍坑山、黃牛山、船灣淡水湖郊遊徑、大刀屻、鶴藪營地、黃石營地、馬鞍山、吊燈籠、夜行大東山、大澳、河背、東坪洲、石屋山、成條港島徑...同行社一齊行過既地方真係多到數唔曬。
同下莊熟就話者，點知同下下莊同下下下莊都ok熟。就怪小弟踏入year 4正式成為FBE學生之後真係無心向學，書又唔讀，又無part time，又唔住hall...隨左寄情行社之後真係無乜好do。
住hall
明明話左上莊就唔住hall, 住hall就唔上莊。開學之後小弟鍥而不舍，猛send email去橙hall同天藍hall報latecome, 同一時間又去傾莊會，我都認我有D花心架喇...
小弟去late come interview其實都係柒到飛起...話說當日仲有五個人同小弟一齊interview，結果我係擺起waiting list第六位...（我都唔記得消息來源係邊度添...）拿明明真係無乜可能住到hall架啦，丫點知橙hall咁鬼多人quit... quit quit下膠津果層都有人quit...十月中已經傾過莊，十月尾收到電話有hall住。傾過莊就唔係幾好意思忽然quit（好彩無quit者），有機會住hall又唔想浪費...
11月1日踏入橙hall。小弟第一個roomate叫做...toby, exchange student LLB year 3. 做左佢兩個月roomate好似都無同佢講過野...我起身佢就訓覺，我訓覺佢就落老蘭。番黎d衫就咁擺起窗台下面洗都唔洗。小弟自問唔算整潔，都有D頂唔順。樓友入黎通常都驚訝點解間房咁臭，後黎仲拎住支resona入黎周圍噴。
好彩佢十二月尾就走左。sem 2黎左個mainland roomate，霆。呢個roomate...隨左會去完廁所唔洗手之後mi餅比我食之外，其實都好好。係第一次同mainland有咁直接既交流，亦都幫我去exchange做左D準備。
住hall，就梗係要玩下hall team。小弟隔離房就係hockey既team leader...而且又係EEE...咁就入左hockey team。先用一支超仙留落黎既木制hockey棍，真係幾重幾唔順手。sem break被逼用720蚊（嘩你知唔知720蚊對當時既我黎講係一個幾大既數字）買左支carbon fibre制既hockey棍，雖然係好用左好多...可惜小弟始終無乜球類運動細胞，通常都係打到一ped屎咁。
話就話freshmen要參加兩支sport team一支cultural team...小弟諗住過左sem break先入多幾支team啦...不過呢，住左兩三個月之後已經無乜心住...自問同樓友唔係好夾，佢地太sporty，幾乎所有娛樂都唔係我style；太撻皮讀書，都唔係我style；浮hall浮到入廠，更加唔係我style。加上住hall係小弟自費既活動，果一萬蚊入學獎學金全數用黎交hall fee樓fee...銀根拮據，而且小弟實在無能力再必多d時間參加hall team...起知道有得去exchange之前其實都決定左唔會住落去...去exchange直程係個完美既理由quit hall添啦。決定quit hall之後同某日起.NET巧遇某大仙，詳談下發現樓入面鮮為人知既針對事件，令我更加覺得quit hall呢個決定無錯。
按規舉freshman一定要做一次大function既OC...小弟做左farewell dinner既OC，farewell班大仙既同時farewell埋自已。負責拍片同剪片既部份，辛苦得黎幾好玩，算係起最後既日子做番D野。
食完farewell dinner，自己一個去停車場做姑lei，搬完野之後同樓友去登龍街飲酒。一層樓飲左10支black label...係我第一次見到咁多人飲醉...well又fare完，酒都飲埋，第二朝番hall趁人少少拎曬一袋二袋閃走左，連byebye都無同樓友講。之後聽膠津講番，樓主因為呢件事都燥燥地。
唔緊要啦，hall（我）對於我（hall）黎講，都係一個過客者。
雖然我唔arm住果度，我仍然覺得點都應該試下住hall。上莊同住hall一樣，講到尾都係人既問題。遇著一班好差既莊友，可能我唔會咁commit。遇著一班好match既樓友，可能我會過O繼續住落去。hall同莊，都提供左個機會，比大家起大學入面識一班最close既朋友，build up 一段long lasting既relationship。就算識唔到，都唔好上高登猛話上莊住hall on99。要知道，各自有際遇作導遊。
丫，講番支hockey棍，臨走前600蚊賣左比team leader，連佢都話我支野係正貨！
exchange
咩叫pet pet痕呢？就係有一日，起海量既portal email入面見到一封Mong Man Wai Scholarship...唔知點解reply左佢，又唔知點解比佢捉左去interview...
呢個Scholarship係資助學生去中國某間指定大學讀一年，名額兩個，包學費住宿來回機票仲有生活費，仲好過比人包養。你以為呢D咁正既包養offer會好多人報？錯喇，因為個email係world wide exchange programme之後先send出黎，有心報exchange既人都報曬，其次係呢個scholarship只係for science / engineering student，再三係...目的地係中國，有少少崇洋既HKU學生梗係睇唔上眼。
所以interview當日，只係得4個人。起初我以為有好多round啦，又或者係有好多批interview...後來知道，原來就係得果4個人報左...而且就係得果一round interview。4個interviewees...其中一個已經有world wide exchange offer去清華，仲拎左world wide scholarship添...一眾interviewer 知道佢背景之後已經ban左佢。另一個interviewee，連普通話都唔識講...又比人ban左。之後...其實都唔洗in，4個ban左兩個，而個scholarship只得兩個名額...
pet pet痕完之後仲撞到條棍，咁就比我拎到個exchange offer...
學費42100, 來回機票5500（按：其實一般來回北京機票唔洗咁貴既...只係小弟見有得claim, 都廢是格價...），住宿費1500...最緊要既係生活費...RMB15000...
諗番轉頭我真係應該捐番少少錢先arm...D人話拎左橫財唔回饋下社會，之後會行衰運架...
果萬五蚊生活費係sem 2先拎到，所以exchange sem 1仲係過住D好清貧既生活，旅行都無乜點去，只係去左次內蒙古。sem 2拎到錢，嘩我D生活真係奢華到呢...做左有錢人之後周圍去旅行，天津哈爾濱青島西安都去過～
起北大既宿舍，三個roomate都係來自中大。咁arm大家都係exchange一年，好快就熟曬啦。晚晚唔係打AOC就係睇戲～sem 2 107號房又黎左一班exchange同學～
隔離樓既103室仲住左好多黎北大exchange既女同學...sem 2果陣有好健康活動架，唔知邊個發起，成日去打羽毛波～仲有某某生日既時候大家仲起樓門口砌蠟燭...我feel到周圍行過既女仔都好葡萄xDDD
對面房係黎自新彊石河子大學既交流生。第一晚去到宿舍碼車之後已經混熟左對面房，之後一年既生活同佢地都好close下，一齊去下三里屯飲酒，去下未名湖溜冰，去下食生日飯，勁happy~一年既時間亦令到對面房既四位mainland成功翻牆，見識到facebook, 六四...講起六四，2009年六月四日我起宿舍聽住網上直播六四燭晚會，大大聲播出黎播到成條corridor都聽到，其實係有意挑戰下...好彩果度D人唔識聽廣東話者...
隔離房係準備黎HKU讀書既委陪生，成日走過黎問我地香港既生活，哈哈
起北大讀書，鑑於無拉曲線制度...60分為合格線仲harsh過中學...所以都唔可以太撻皮。有D太harsh既course真係頂唔順，例如個java course, 用eclipse寫番個eclipse出黎，小弟真係無咁好心機同你癲...一年take左8個courses，最後只係trans左7個course番黎...
去左exchange成年，隨左學識講普通話之外好似無乜得著，會唔會有D浪費呢？（例如無巴結到D高幹子弟又或者共產黨員=p）
仲好掛住飲奶飲到當水飲既日子...特別掛住冬天果排，買1L酸奶番黎，飲唔曬隨手擺出窗台就得（因為出面仲凍過雪櫃）...三聚青氨？為左飲奶我乜都唔驚=p仲有好掛住北大南門1蚊羊肉串（雖然唔知係咪真係羊肉...）仲有南鑼鼓巷既文宇奶酪...𥵃街既花家怡園霸王雞...嗚呀...做有錢佬真係好...
講起食野，全聚德其實都無乜特別，要食高檔野應該去大董。等埋位都有紅酒（雖然唔知係咪假既...）飲，仲有姐姐親自黎教我地點食北京填鴨，正！
起HKU上行社，去到北大梗係玩下山鷹社。呢個社真係好鬼chur, 分分鐘chur過住hall...每個禮拜有兩次physical training, push up sit up 跑圈拉筋乜都齊曬。逢星期幾可以去攀石，話說果度有成15米高，小弟乜skills都無，爬左唔知幾多次先成功到頂。
山鷹社D裝備...就唔洗講啦，d gears多到幾間房都擺唔曬，連行雪山既鞋都有=.=...講起雪山，佢地真係好興行雪山，行到死人都要行。唔係講笑架，佢地2000年同2002年既活動都死過人...
佢地個O camp，犀利喇，燒柴煮飯唔講，閒閒地由100米行到上1000米，呢個只係休閒camp...小弟之後再參加多個穿越雲蒙峽，一個團得20個人，個個都有role and responsibility...我好似係做後勤，即係買下野食煮下飯咁...有D童軍feel
睇番行社，原來真係太幸褔
讀書
year 1 sem 1，又要搞CE nite, 又要搞童軍campfire，又parttime，又36 credits...都咪話唔chur...不過初入學，唔係好拿捏到要出幾多力讀書...好似有唔少同學剛剛入大學就撻左皮...造就左我3條A+，1條A呢個咁輝煌既成績...如果唔係有D垃圾account / ECEN / 中文阻鬼住曬我爆4啦...
year 1 sem 2...住hall上莊part time 39 credits, 真係爭在未拍拖架者...真係唔係講笑，chur到暈低...唔知關唔關比人捉plagiarism事（拿我係借assignment比人抄果個！），CSIS1122得B-真係奇恥大辱...又因為AGM同IELTS無考到ECON1001第1次midterm...FINA1003我又唔係好得...多左兩條C+...直程唔過3添...
year 2... exchange理應係讀得頹D既，但係為左保住合格，點都要讀下。有幾科特別chur...例如算法設計與分析，個個禮拜都有4條acm 題目....要自已去pku 個acm judge到玩=.=....痴線，我諗真係靠自己完成既得60﹪，其他都係上網抄既=.=...最難既係佢連個final exam都要玩acm judge, 3個鐘做6條...小弟犀利喇，只係做到一條，好彩都合格
year 3... sem 1造就我大學史上最光輝既GPA 3.66...因為year 2 project 同FYP都係計落sem 2=.=...呢兩個project打孖黎都咪話唔chur...小弟比較懶，兩科都係B+而回。如果year 2 project肯出多兩錢肉緊，求其做多個extension實衝到A-番黎，又如果無FINA2802起度陀手lung腳多左條C...就唔會好似而家咁得2nd up la...
Year 2 project既topic係要用assembly language + VHDL，控制一個相機影相然後save 落RAM入面...無錯，即係大家拎起部DC, 禁落快門制...就係禁果一下制既action, 我做左3個月...
Final Year Project既題目係...係...係...死火喇我花左成年心血我連個topic都唔鬼記得左。一句總結，就係...「估恆生指數」。用咩估呢？小弟做既唔係基本分析，而係技術分析，feed左近10年既恆生指數data入個programme度，希望個programme可以幫我估到聽日恆生指數係升定跌，大概幾多點。個programme運用左machine learning既concept, 係artificial intelligent既一種，technical D講係用左neural network...
我知道你心入面梗係諗緊...咁你個programme work ng work呢！？...
如果work既話我而家同緊Warren Buffett食下午茶啦...丫我忽然醒起喇：FYP既topic唔exactly係估恆指，而係「有咩factors會影響neural network估恆指既表現呢？」
呢個topic都幾廢...就好似何俊仁選特首咁，「究竟有咩factors會影響何俊仁當選特首既機會呢？」根本就唔會選到，講乜鬼factors...不如直接叫我分析佢點解唔work佢好啦。
year 4... sem 1 知道左食古不化既FBE唔比我36+36既形式修讀，逼我12+30+30...真係沒有最on9只有更on9...因為小弟去exchange果陣無take過business courses，而double degree既requirement係讀完1st degree果陣要起碼take左57個business credits...截自year 3尾我只係take左45個credits...只要FBE開通少少，比我36＋36，咪無問題lor！唔知邊個落order話我year 4 sem 1無論take幾多business courses都好，都只會count 12個credits...
不過呢...塞翁失馬焉知非褔，如果唔係FBE逼我defer都搵唔到而家份工。
呢年開始我take既全部都係BUSI/ECON/FINA...大多數都無乜興趣，所以year 4開始我唔覺得番緊學...都係求求其其就算啦...無上莊無住hall無part time無拍拖(for sem 1)既生活真係頹廢到飛起，所以行社D function都去得好足下xDDD
sem 1 take左intro to econ II, microecon theory, 幫小弟明多左econ係乜東東。sem 2再take埋macro analysis, math for econ, uncertainty...雖然只係take左6個econ courses, 小弟斷言uncertainty係ECON undergrad course中最難計既一個。各位有番咁上下數學能力既econ人可以挑戰下。
year 5 sem 1... 雖然呢個sem 只係完左無幾耐...我已經對呢個sem無乜印象...無辦法，拎到offer之後...番學既感覺由0.0001跌到落去0... business law果條鬼佬又唔take attendance, 又無exam, lecture我諗我只係上過幾次...最難搞果個case studies in corporate finance, 好彩拍住神級鬼佬，如果唔係真係分分鐘炒粉...Advanced Corporate Finance, 又無source上堂又唔係好明，真係靠自己讀番黎...
intern
做人呢...唔洗成日都咁好彩。起D critical moment好彩下，已經好夠。
唔知點解，小弟每一次搵intern都咁好彩。做過三次intern，每一次都好緊要，每一次都係為下一次intern做好準備。
year 2，仲係身處北京，好難搵香港既intern...都係求其send下email去P公司...我諗梗係因為P公司本身係電訊公司，唔介意打長途電話黎北京比我...phone in我...番到黎香港再面試一次，我都算柒喇，柒到搞錯左interview既日期...interview果日原定時間半個鐘之後HR打黎問我做乜唔黎interview真係嚇到我賴尿...第二日去in番，竟然咁都比我搞掂...
試問一個year 2既學生，intern都未番過識得幾多野丫。又PHP又javascript...大佬，我真係完全無概念...好好彩咁有個神人同我一齊番intern...上頭派落黎既工作基本上全部都係佢做，我只係起隔離睇住佢做就ok。頭果兩個禮拜都淨係睇神人做野咁濟，我既web technology知識就係呢段時間萌芽。神人做左一個月就無做，梗係啦，佢既Talent黎做intern簡直係浪費。好彩淨低既日子我都可以自已應付到...仲自已學識左AJAX...
AJAX...係第一樣由0開始我單靠自已學識既技術。果排真係狂熱到放左工番到屋企都會對住部電腦苦思數十遍...「究竟點解段script唔work架呢？」仲記得第一次改到段script work係星期日下晝，我好似L咁mou起張凳上面...禁禁下竟然得左...果下喜悅真係難以形容！
呢一堆PHP同javascript既知識日後都唔知幫左我幾多...
year 3...都幾多intern offer...先有某法定組織既 1 year placement offer。不過呢，因為我唔想讀五年U（甚至更長），如果我要左呢個offer好有可能就會放棄double degree...又好彩同兩位起果度做過intern / placement既人傾左好耐...最終得出個結論...
講下題外話，果個組織既其中一條interview問題真係好有趣
「你地...有無睇我地近排新出果個廣告？」
「（四人異口同聲）有～」
「識唔識唱果首歌？唱黎聽下得唔得？」
全場鴉雀無聲...
答案係...
問我～基金價格幾多～
問我～孖展幾許風波～...
然後有某交通公司既offer...呢個interview真係好搞笑，一男一女interviewer, 個女interviewer好明顯仲怕醜過我...我只聽過interviewee唔敢望interviewer, 未見到有interviewer唔敢望interviewee。起度真係要同電車公司講聲對唔住，我係留voice mail話reject offer, 點知果位HR小姐聽唔到voice mail, 開工前兩日打黎同我講開工既野。「er...唔好意思，其實我reject左個offer啦wor...」咁遲先覆佢，唔知有無搞到佢地請唔到intern呢...
仲有一個accept左既offer，該公司好proud of自己有中原地圖呢個大客...實際上，只係用緊美國總公司既product, 我地只係做下deployment...同少少development啦。學左一個星期C#, digitize 左三日地圖，落site...即係地政署定測繪處做onsite IT support...
後黎因為有Y公司既offer,做左短短兩個星期就quit...
都叫左學多左D野既...親身見識到政府部門係幾咁hea...同埋，咩叫做geographic information system
Y公司個interview明明我答到成ped屎咁...老細問既networking問題我一條都唔識答。唔知點解都請左我。Y公司wor, 雖然連創辦人都辭職，起IT界都叫有D名氣丫...老細開左個頭，等我同另一個intern夾手夾腳寫左個firefox plugin...又基於原有既javascript 知識學左堆HTML5同CSS3...
year 4...原本諗住報grad job架喇，點知d grad job收曬皮，同時又知道要defer，咪轉報intern lor...我估係intern既門檻比grad job低，所以小弟符符碌碌左入去兩個final round interview...其實之前都講過，year 3失敗既經驗加上Y公司既名氣，有少少工作經驗，加上真係prep足先去interview, 真係神蹟降臨我竟然有得揀要邊個offer...
well...我認我係因為人工（同食飯麻唔麻煩）而make final decision...究竟係arm定錯？
比我reject左既果個offer, 其實已經好清楚知道要做乜...果個manager起in完果晚直情skip埋HR直接打電話黎，同佢斟左一輪...
「我地係做cash equities IT既，有自己一套language，出面無架...你有無興趣？」
果時未知有另一個offer, 梗係lu飯應
做IB IT係會exciting，同應該學到D先進D既technolgoy...果時我都識同自己講，proprietary language都無所謂丫，programming呢D野係transferrable skills黎架麻...
不過呢D野，都係God knows.
結果reject呢個offer，入左而家番緊工既呢度，只係做左一個無人用過垃圾tool出黎。錯就錯在...根本連requirement都錯。
論programming skills論presentation skills論time management論team working小弟自問全部都很不濟...但最終都拎到return offer，我完全覺得係因為老細好人...唉可惜，我再番黎之後幾個月呢個老細就走左喇...
。。。。。。。。
心水清，又有耐性逐字逐家睇到黎呢到（而且好八掛）既你可能，好期待最後一個topic...
無錯！就係拍拖既總結喇！
呢個總結我寫完又cha, cha完又寫...寫完再cha左成半年都有...
呢幾年我覺得，一命二運三風水真係好arm
有太多野唔係我地可以控制到...隨左自己，你控制到D乜野？
遇到咩同學，遇到咩莊友，搵到咩intern...我可以控制到既，有幾多？
其實，根本連自己都控制唔到。你控制到自己讀書叻唔叻咩？你最多控制到自已有幾勤力...不過勤力係無乜用既...越讀上去越覺得，「天才係99%努力加1%既天份」呢D真係害苦左唔知幾多細路...甚至我會話，你有幾勤力其實都唔係你自己控制...
即係話，就算，就算上帝真係會擲骰仔，果個叫做random, 只係話nothing is pre-determined, but that does not mean it is control by YOU.
所以我真係好幸運，真係真係好幸運，random中我呢條命
感謝主，定謝蒼天拜祖先好，我都想多謝下。雖然我唔知應該多謝邊個。
多謝我既同學，陪我一齊讀書搵Source打DotA
多謝我既莊友，比左個咁快樂既莊期我
多謝我既下莊，令我覺得...我好似無落過莊咁XD
多謝我既hallmate, 雖然我起hall既生活認真麻麻，總算比我感受過hall life
多謝咁多個in過我既人，無你地既signoff, 無今日既我...
篇野，2012年年頭已經打左99%
但係改黎改去都係唔arm心水
我諗永遠都唔會arm
所以...都係...算啦
Recent Comments