March 21, 2010
-
行社四十七莊 Function 2 大城石澗
得閒既時候先打番書面語...打書面語諗得比較耐...起呢個衝鋒陷陣既時刻, 雖然節省多一秒既話, 可能只係hae多一秒, 不過唔理, 慳左先, hae多一秒都好
早餐團呢樣野真係唔少得, 除左有食早餐呢個實際需要之外, 更加係遲到既buffer time, 遲左早餐團唔緊要, 起碼唔會遲function出發時間...可惜尋晚臨訓先醒起, 今朝差唔多搭車去到荃灣先send msg問, 結果當然無用
0905自己一個去到荃灣食美心早餐, 美心既早餐真係唔得, 我都唔明點解, 美心做左咁多年都可以毫無進步...
食完之後去7-11買埋晏, 剛剛九點半...
起7-11門口見到蘋果頭條, 話一個爸爸起網誌寫佢等死既呢一個月...一睇到果下我就諗, 我會唔會寫xanga寫到我死果日呢sosad...雖然尋日先話完可能會轉blog...不過呢, 用得耐係有感情既, 而且以前既野都擺曬起度, 放唔得低
0945收到debby既電話, 犀利喇, 佢話會遲到, 而且話唔好問佢起邊, 總之要等埋佢...1小時之內到=.=...
原本Henry叫我睇住佢果組個西人既...不過而家唔駛啦, 我轉做負責起地鐵站等遲到既人=.=...起碼有兩個西人同一個mainland遲到...仲有...果個時候benny唔知去左邊度...我負責睇埋佢個袋...total要等6個人=.=...
唉唉=.=...上上莊都要拎住張namelist企起地鐵站等member...=____=|||||...
好彩同個藍芽耳機叉足電, 狂聽陳奕迅隻新碟...1011收到Eirene話果位mainland同學”已經到左”, 我expect個意思係到左地鐵站...聽到1020...終於等到benny番黎, 從佢口中得知兩個西人去左上環=.=||||...唔知Tseun Wan起邊, ok fine, “The final station of the red line”, 呢個instruction真係好唔清淅, 不過都無理由去左上環下化=.=...結果放棄左兩位西人...然後再知道果位mainland同學係”已經到左小巴站”...OTZ...
1030等到Debby...去到小巴站一睇, 條龍長到嚇死人, 等小巴既話起碼要等三架...Ringo話出錢搭的士...我梗係話無所謂, 結果仲快過搭小巴既果D人XDD
好快去到菠蘿壩...等齊人就開始介紹下行社, 莊員同D上莊...印象中好似無講到我同阿亮同Debby XD? Henry又無搵番我入佢果組, 我連佢出發左都唔知=.=...咁仲好, 幾個上上莊企埋起最後面吹水
47差KC Martin無黎...46莊有ringo/lala/Hilda/iris/Sidney/jacky/john
城門水塘條路...真係悶到訓著...又行得慢...唔聽住歌行既話...真係悶到暈低...Terry話pre完trip之後覺得...由灰橋行到肥佬麥真係太長, 所以cut短左一半...起灰橋之前個公廁分叉位...唔轉右, 改為轉左, 行多一陣山路, 起大城石澗既中間cut入去...
石澗...雖然短短一個月之內第二次行, 我都仲覺得好新鮮wor, 因為石澗真係有無限種行法, 除左D好特別既位之外, 又唔會好刻意咁記住究竟應該行邊度...原本應該要跟大隊慢慢行既...但係我話...人地行邊度, 我地就唔行邊度XD阿亮又真係跟住我行...一行就過曬果D排緊隊慢慢行人=.=...
Debby今晚要睇eason演唱會, 我又約左人食飯, 阿亮又話想早D走...所以由原本貪得意行快兩步, 變成刻意行快兩步, 諗住如果佢地真係太慢既話...就唔等佢地可以走先=.=...
行得快既後過就係...唔睇清楚條路就衝上去...今日雖然全程對鞋都無濕過, at least 鞋面無濕, 鞋底店過一次水面...起d攀石位都係7左一次...明明就就有條康莊大道起一邊, 想行快一步, 行左澗中間既一條石lar...想好似成龍咁兩個膝頭頂住兩邊既石, 然後舉高手禁自己上去, 點知起我禁到石面之後隻腳頂唔住sin番落去, 磨到兩邊膝頭都有D痛...不過好彩無人睇到者=.=...
又有一次, 完全係判斷錯誤, 左邊條路明明係越行越窄, 盡頭直情係無路可行, 要行番過右邊岸, 上次我都識得揀行右邊, 今次竟然行左左邊...起盡頭處要冒險跨番去右邊...
原本以為大家唔會行澗唔會行得好快, 但係...其實都跟得幾貼, 比我想象中強...初頭話要行到五六點, 我地五點鐘已經全部行番到去菠蘿壩...
其實我都覺得有D唔係幾好, 由頭到尾都係focus落自己行...真係無理過佢地咁...唉唉...
丫, 有樣野其實想問, 但係唔記得左問...我想知我份1122 assignment 1幾多分sosad
幫Debby反映一下佢既睇法先:
佢話無人正式通知佢今日行澗wor=.=...”都無人叫我黎, 做乜要黎者”
(勁harsh@_@...不過都係既, 我同佢呢類”偽final year”都係好chur既...)
時光隧道塊板仲係寫住46莊
擺counter擺得4日...(其實呢個我都想mention下...點解得一個禮拜咁少=.=...)
我都係起度raise下者...真係無其他意思...我唔想我係果D淨係識企埋一邊指手畫腳既人
行完之後...五點幾番到荃灣食tea...不過我都約左人七點鐘食飯...所以乜都無食到...
1815離開荃豐中心...1819目送一架西環小巴離開...上左另一架小巴, 1830開出, 1837去到葵芳小巴站...1847去到西隧口, 1850去到東邊街...唔知點解可以好彩到全程綠燈咁濟=___=...呢種速度, 絕對值得我比$15.5佢
晚飯wif 膠津/黎漢中/亨(享)笙(我怕以後我真係以為享笙叫亨笙sosad)
幾個人坐埋一檯, 都係9 up下者...
食完飯之後比黎漢中話我今晚煩燥左, 無平時咁和順
“可能你做FYP做到太煩啦”
Maybe
丫, 今日聽聽下, 覺得無人之境都幾好聽, 特別係聽埋D詞...
又有另一樣野想講下...
呢排成日有人話咩去雲南旅行, 又話想去埋西藏之類...
呢排成日有80後話置業困難
呢排網上面有篇文批評80後置業困難, 其中一個原因係...”又想要iphone, 又想一年去幾次旅行, 又想成日買靚衫, 其實人工就只得果萬零蚊, 你話我知, 你咁樣要儲幾耐先比到首期? 樓價高呢個係事實, 但係你嗔完一大輪之後, 有無諗過點樣面對呢個問題?”
呢排網上面有另一類意見, “反正置業咁困難, 點解我仲要中個頭落去? 做成世地產商既奴隸? 我決定, 要做月光族”
(按: 月光族 = 每月花光所有薪金一族)
就黎畢業喇各位...呢D問題係時候要認真諗一諗...
April 7th Deadline of Final Year Project report and technical paper
April 1?th Presentation of Final Year Project
April 20th Deadline of Integrated Project report
April 21st Demonstration of Integrated Project
起過呢幾個deadline之前, 我諗我成個人都會keep住起一個tense到飛起既狀態
呢場幾乎可以話係我大學生涯既最後的戰役...
起April 7th 之前, 呢次應該係最後一次咁長既xanga...
Recent Comments