(原本想整到篇xanga好笑D…不過都係放棄左…)
通識毅行
由大浪灣出發, 逆走港島徑至盧吉道/夏力道及龍虎山健身徑既交點, 經健身徑落香港大學, 全長約50公里…上年最快紀錄係九個半小時完成…
Stage | Route | Distance (km) |
1 | 大浪灣到大潭峽 | 3.5 |
2 | 大潭峽至土地灣 | 5 |
3 | 土地灣至大潭道 | 7.5 |
4 | 大潭道至柏架山 | 4.5 |
5 | 柏架山至黃泥涌峽 | 4 |
6 | 黃泥涌峽至香港仔水塘道 | 7.5 |
7 | 香港仔水塘道至貝璐道 | 6.5 |
8 | 貝璐道至薄扶林水塘 | 4.5 |
9 | 薄扶林水塘至盧吉道 | 5 |
10 | 盧吉道至香港大學 | 2 |
原本我地第66組…四個隊員分別係…我, Billy, Debby同阿匯…不過呢…Debby同阿匯話唔黎得, 個位讓左比Ringo同…Ringo既hallmate…(或者話係我中同)Angus…
但係起起點果度, 佢話我地無事前通知大會, 所以Ringo同Angus一定唔可以參加, 最多跟行, 有咩事大會唔負責, 而且我同Billy一定要combine with其他組一齊行…咁既情況下…我地梗係跟番第20組…行社46莊女子組…
於是…第20組, 有六個合法組員: Iris, Olivia, Lala, Hilda, Billy, 我…另加非法既Ringo同Angus
Stage 1: 大浪灣至大潭峽, 3.5公里, 累計長度: 3.5km
Billy話汲取左上年既教訓, 今年一定要排頭位咁出發…成功咁爭取到個前排位…吹雞果下前面D人個個一開始就跑=.=…開頭跑一陣先都arm既…後面真係太多人, 慢慢同後面一齊行既話真係會塞車…
起去到第一個checkpoint 大潭峽之前, 起我視線範圍之內已經得番我自己果組, 同埋前面有另一組…
話都無咁快就行完呢段, 話曬係剛剛開始者, 大家都體力充沛
Stage 2: 大潭峽至土地灣, 5公里, 累計長度: 8km
龍脊, 呢個聞名已久既地方, 終於可以黎見識下喇…老實講成條港島徑最有睇頭就係呢個地方, 龍脊附近D路又唔難行(不過唔知點解漁農自然護理處話難度係3粒星…)
呢個地方真係可以影好耐相, 如果唔係有人計時既話呢, 真係要hae行呢段欣賞下風景…
唔知點解Ringo同Olivia起呢段就落後左, 我地組前面六個人都到左checkpoint, 但係要等多5分鐘左右後面先黎到…起我地等既時候已經有多兩組黎到…而且出發埋添=.=…
呢個時候見到既呢兩組…大概就係我地黎緊十個鐘都見到既幾組之一
Stage 1 + Stage 2就係港島徑既第八段…逆走佢無乜難度, 特別係一開始就行…如果行順走成條港島徑既話, 第八段呢種斜度, 都足夠殺死人=.=
Stage 3: 土地灣至大潭道 7.5km = 港島徑第七段, 累計長度: 15.5km
7.5公里既引水道…真係行到訓著咁濟…條路真係悶到爆炸…行彌敦道都話可以window shopping下, 再唔係睇下迎面而黎既靚女…行呢度真係…睇大潭港lor…不過都唔知有乜好睇, 係見到d人好開心咁玩緊D水上活動lor…睇下對面紅山半島有幾靚lor…
呢段路…我以後, 我今生今世都唔會再行…反正土地灣同埋大潭水塘(北)都有巴士站, 假日既話可以搭314代替港島徑既第七段
Stage 4: 大潭道至柏架山 4.5km = 港島徑第6段 累計長度: 20km
呢段都幾輕鬆, 仲輕鬆過之前段引水道…因為唔知點解大家都好似行慢左…大半段都係平路, 係後面果半個鐘微斜上山…呢個時候體力尚算充沛, 而且同Hilda講下行下講下行下…唔覺唔覺就上到大風坳
呢段順行既話, 應該真係超輕鬆, 順行既話全程落斜, 但係又唔會斜到好似龍虎山健身徑果隻咁…有時條路太斜既話, 落山都會覺得辛苦…
Stage 5: 柏架山至黃泥涌峽道, 4km = 港島徑第五段, 累計長度24km
睇下地圖就知, 其實中間係有條大潭水塘道…簡直就係港島徑既捷徑…上一次同阿爸阿媽行山就係行大潭水塘道…勁開心勁易行…但係…如果沿住港島徑黎行, 簡直就係惡夢既開始…
初段大風坳上畢拿山…聲稱有599級樓梯…但係我覺得絕對無lor…如果用番九徑山黎比, 我覺得只係九徑山既三分之一, 即係300級左右啦…雖然我係行得慢, 但係我無停過就上左頂…
之前都聽過話呢條天梯難行架喇, 不過, 淨係以天梯黎計, 我高估左佢…
接住落黎由畢拿山去渣甸山, 呢段先係全條港島徑入面我最估佢唔到…短短既2.5公里…又上又落再上再落勁上勁落…就係呢一段, 令到我開始覺得有d chur喇=.=…
幻想下去到陽明山莊, 就可以去百佳買野飲…幻想下者, 其實大家心入面都好清楚知真係幻想下架者, 係咪sosad? 明知係望梅止渴…都有少少激勵人心既作用既…
Stage 6: 黃泥涌峽至香港仔水塘, 港島徑第4段, 7.5 km, 累計長度31.5km
Stage 6開始就再無見過Ringo同Angus喇…一開始就比我/Billy/Lala/Hilda撇甩左後面四位=.=…
段路唔難行, 隨左開頭有好多豪宅果段布力徑係斜路之外…大部份都係平路…係崩潰在, 條路真係好長=.=…7.5km = 15支標距柱…我地四個好似全段無休息過? 而且已經行左24km…
行行下聽到後面既電話, 話Angus抽筋…ringo會同佢退出先, 由於佢地係非參加…就算佢地退出對我地組都無乜影響…果時諗住Iris同Olivia同佢地一齊行, 應該都會行得好慢…果時就比左個錯覺我…就係可以起黎緊既checkpoint 大休一下…
點知…我地柒左, 起一個去灣仔峽同貝璐道既分叉路上面, 我地行錯左, 浪費左我地大概20分鐘…
呢20分鐘…係生命中不能承受既20分鐘…
起我去到checkpoint 6, 拎左支水, 起Hilda個袋到拎包寶礦力粉出黎之後, 仲倒緊落水, 就收到個消息, 就係Iris同Olivia已經超前左我地四個, 向緊checkpoint 7進發…
Stage 7: 香港仔水塘至貝璐道, 港島徑第3段, 6.5km, 累計長度: 37.5km
剛剛行完7.5公里, 支持我既係起checkpoint 6既大休…起美夢破滅既一刻, 前面仲有6.5公里…平路依然係平路…但係我對腳已經唔係我對腳…
呢段路…又係悶到爆…係咁轉彎, 兩邊都係大樹, 完全無風景睇…不過…我諗就算有都好, 我都應該無心機睇架喇…
Olivia同Iris都行得好快下…我地四個起後面…差唔多追左一半Stage 7先追到上去…
6.5公里又係全程無停過, 都幾難捱…後面果2公里左右, r下Iris講野先頂到落去…r問曬D無聊exam time table…講下佢讀chem d野…行山最緊要就係有人一齊行, 正所謂…吹水既時光過得特別快…吹下水就過左兩支標距柱…吹下水又過多支標距柱…
Stage 8: 貝璐道至薄扶林水塘, 港島徑第2段, 4.5公里, 累計長度42公里
呢段路我細細個就行過啦, 不過我係順走之麻…呢次逆走真係要左我條命…由H022至H020…果段樓梯加斜路…真係行到感覺到自己就黎訓低=.=
綜合埋身體狀況黎講, 呢唔夠200級樓梯榮膺全程最chur呢個名銜…(for me者)
樓梯既盡頭就係置富花園後面果段又上又落既石屎路…去到H017附近有個三叉位, 一邊係落置富花園, 一邊係斜路上去薄扶林水塘…我識得兩組朋友都起呢度落左置富花園=.=真係O曬咀…可能因為佢地黎到果陣已經係夜晚, 睇唔到指示牌搞成咁
Stage 9: 薄扶林水塘至盧吉道, 5km, 累計長度47km
前半部份又係果d彎彎曲曲既山路, 兩邊都係大樹果D…又係無野睇…
已經行到個人psychologically無曬感覺, physically對腳已經痛到呢…行緊Stage 6既時候我地仲起度講話, 其實大家對腳都係痛既, 只係有D人承受到, 甚至係習慣左呢種感覺, 所以可以keep到速度…但係呢…黎到尾段, 真係唔係好頂到…而且我前面係iris, 後面係hilda, 實在係無乜動力推我行快D
去到H010太陽已經落山…H009天黑…一路至到H007, 起瑪麗醫院後面果段…又係d樓梯位…唉…真係救命…
H007到盧吉道全程上斜既石屎路…唔知點解果時我又行得ok快喎…
Stage 10: 盧吉道至香港大學, 2km, 累計長度: 49公里
Shit, 關節痛既時候…最唔好就係行斜路, 每一下落地都好似想禁爆個關節位咁...我落斜真係落得特別慢=.=…偏偏呢2km真係全程落斜…全程都痛到呢=.=|||
不過終點在望, 再痛都可以支持到落去既
全程我地花左11小時1分鐘, 起香港時間晚上7點零1分番到香港大學黃克競podium…係全場第8組番到HKU…mix組第一名(自己加比自己既獎項黎者…頭果7組都係全男班黎既…)
起SU can鋸一鋸扒先番屋企沖涼訓覺…訓著果下應該係晚上10點鐘…照我估計…呢個鐘數應該仲有人行緊番HKU XDDD
老實講我唔係好夠fit去行通識毅行, 如果唔係前面有Billy chur住既話…我都唔知要行幾耐XD…太渣啦我XDDD
Recent Comments