[香港旅遊系列]
[超長系列, 5000字+]
青嶼幹線觀景台=>荔景=>葵涌和宜合道運動場=>荃灣三棟屋博物館=>屯門黃金海岸=>屯門龍鼓灘=>天水圍濕地公園=>吉慶圍=>上水回歸紀念園=>林村許願樹=>大圍車公廟=>西貢碼頭
大家可以禁呢度睇下我今日條path
原本同F plan好去白泥, 不過見今日天陰多雲又落雨, 睇日落呢個活都係容後再議
"去九龍新界十四區遊覽有無興趣?
嘿嘿, 奉陪到底
其實一日邊去得曬九龍新界十四區丫...原本我淨係plan到吉慶圍, 諗住去埋上水已經係超額完成...點知之後仲去多左咁多地方=___=以行政分區黎講, 今日去左葵青區, 屯門區, 元朗區, 新界北區, 沙田區, 大埔區, 荃灣區, 西貢區, 新界九區獨欠離島區
話就話去遊覽, 其實係F工作既一部份...哈哈, 唔關我事啦, 我就真係黎遊覽既
8:30由卑路乍灣公園出發, 搭10($3.4)到香港站, 轉地鐵到青衣($5.5), 0922到達, 時間預得非常好, 剛好趕上0930開出既專線小巴308M($6.5)繞經青嶼幹線觀景台既特別班次
景點呢樣野, 作為一個本地人, 真係分分鐘無遊客咁熟...我估有唔少旅行團黎香港都會參觀下青嶼幹線觀景台? 話曬青馬大橋係香港地標之一wor...我呢個香港人今日就第一次去喇...但係...感覺上個view就麻麻者, 係選址有問題, 同果兩條橋既夾角太細, 近自己果邊條橋顯得太過遠自己果邊既橋好多好多...睇落去有少少奇怪...
汀九橋
青馬大橋
呢個觀景台...都幾鬼難去, 每小時只有兩班小巴經過會停站...其實有唔少E車/NR(即係去柏麗灣既)車都會經過丫...偏偏就唔肯起果度開個站, 搞到我地走既時候要搭的士=___=($30)返青衣地鐵站...個的士司機都幾搞笑, 我都見到牌上去地鐵站...佢都見唔到...起我出聲想話"我地係去地鐵站wor, 唔係後面咩"果陣佢就"哎, 死火, 行錯左添"
下一站, 應該係貨櫃碼頭, 鑑於工作要求係去影相, 去到貨櫃碼頭門口反而未必影到, 所以搭地鐵去荔景($2.4)望下, 起賢麗苑商場頂層影左幾張相, 不過都唔係幾影到...
荔景A出口, 曾幾何時我好熟呢個地方, 婆婆搬入老人院之前, 媽咪每個禮拜日都帶住我黎探佢...
跟住去和宜合道運動場, 和宜合道呢條街, 聽交通消息好似耐唔耐都會聽到, 原來起葵涌上少少, 起荔景搭46X($7)過去, 架車咁貴...係因為佢要經城門隧道去顯徑, 我地起隧道口前落車真係蝕左比佢=.=...因為呢...原本我諗住起葵涌搭小巴去碼頭門口...再番葵涌, 唔expect起荔景去和宜合道, 架車係臨時搵出黎...無時間再搵下有無平d既方法=_=
呢個運動場都幾細, 但係有一樣其他運動場無既野: 哥爾夫球練習場=_=, 起果個咁細既草場上面練哥爾夫球...真係...不如番office練算喇=.=....又係好快咁影完相就走
原本諗住搭48X, 點知73X黎左先, 反正都係$5, 同樣去到荃灣眾安街, 就上左
落車驚見同一個站, 有架61M, 都話經黃金海岸, which is 我尋晚留意唔到...仲等我諗住搭53去...真係...好彩無咁做者
下一站係三棟屋博物館, 呢個咁standard既博物館小學生係咁一定去過? 但係我又無乜印象wor...小學去既博物館我淨係記得大埔火車博物館=__=...以為自己會覺得三棟屋好悶, 諗住佢都係介紹下舊式建築之類既野...我都無估錯丫, 都係介紹舊式建築, 但係唔知點解...睇睇下我又覺得幾好睇wor...feel到自己同以前有少少唔同左...
睇完博物館, 係1148, 食個飯先...F同我都係極隨意既人...真係是但一間都ok..."呢間...好似, ok wor" "可以坐低架啦"
大家姐車仔面, 唔錯
食完繼續去下一站, 黃金海岸, 就搭番剛剛發現既61M($7.9)去...舊式冷氣巴士@_@...即係上層仲係3個2個既坐位分佈方式...哈哈, 我覺得九巴派比香港島用既車好似係靚D~
老老實實, 我覺得途經屯門公路望到既青馬大橋同汀九橋係靚過起青嶼幹線觀景台度望...
另外, 無意間屯門公地面有n個去水蓋連埋一齊...心中不禁暗呼...幸好當日於E公司, 小弟負責數碼化的是元朗公路而非屯門公路...
黃金海岸, 我都唔明點解會有人鐘意住果度, 個景係好靚, 但係交通真係極唔方便...永遠唔會有地鐵呢個已成事實, 西鐵繞經元朗先落去屯門就係話左比全世界知, 屯門公路下面唔適合起鐵路, 黃金海岸既住客一係自己渣車, 一係番屯門搭車, 一係搭青山公路既車...無一個係good choice...
起青山公路邊影左陣相, 然後轉出去黃金泳灘...我地真係行曬成個泳灘架...行到盡到相影果對金海豚...點知...搭曬棚架...維修中sosad...
好似話呢個泳灘係100%人造出黎, d沙本黎就唔屬於果個地方, 所以有颱風吹襲既時候, 黃金泳灘既沙係流失得最快, 政府要成日買沙倒落去...呢d...咪就係正宗既倒錢落海...sosad x 9999
下一站係龍鼓灘, 原本我諗左搭K51/K53去到屯門西鐵站落車轉K52, 上左K51(學生半價: $1.8)之後, 查到可以起三聖村轉K52($1.8), 仲快
龍鼓灘, 呢個偏僻到飛起既地方, 以前比我既感覺係...淨係用黎走私...原果度都幾多人住, 又有人玩下風帆...我諗我就算玩都一定唔會去果度lor...d沙...定泥?係黑色既, 浪衝上岸果陣都隱約透出一股黑氣...個灘又細又多垃圾又臭, 根本就無可取之處=__= 起龍鼓灘影左陣相, 見到後面山有個亭, 係"中華白海豚瞭望臺"@_@...就走左上去睇下...行左大約320級(我數住架!)先到頂, 居高臨下咁望番落黎, 個景又唔錯wor, 望到南面發電廠, 機場, 東面青山發射站...西面望到龍鼓水道, 即係中華白海豚出沒既地方(當然係要好彩先見到...), 龍鼓洲同沙洲...
沙洲個地形同馬屎洲有少少似, 沙洲係連島沙洲黎, 即係中間有一條好窄既沙路連位兩邊島, 潮漲既時候可能會cum左條路...我特別留意到呢個地方, 係因為, 我覺得好似飛女正傳入面..Janet Bin咪帶左簡醫生去"泰國"既...我覺得果個"泰國"就即係沙洲=.=....
有連島沙洲呢個特點既地方...起香港仲有橋咀...唔知仲有無呢?
搭K52($1.8)出番屯門, 起蝴蝶輕鐵站轉輕鐵...先上610, 搭到澤豐轉751, 去到銀座再轉705, 呢程輕鐵真係抵到爛, 因為我地係搭K52出黎搭輕鐵, 有轉乘優惠, 加上學生半價, 搭左25個站, 由屯門去到天水圍, 原價$2.8, 減番K52既車錢, 只係($1)炸!!!!起濕地鐵園o都果下我望住個車資果下真係呆左, 呆到唔記得要比後面既人o都卡=__=
銀座果個站好搞笑lor, 唔知點解嘉湖銀座商場門口有經多叔叔伯伯坐起度睇報紙波經馬經=_=
輕鐵既站名都幾fake人, 濕地公園站好明顯就唔近濕地公園, 濕地公園入面既行人隧道, 係通往天秀站而唔係濕地公園站...
濕地公園4點鐘停止售票, 我地去到門口已經係1617...無所謂啦, 就算入得我地應該都唔會入啦, 反正入面都無野睇, 影下門口, 起入口處隔離既斜坡行到頂再影幾張就走...
下一站係吉慶圍, 我原本plan左去元朗搭西鐵去錦上路, 出站行15分鐘...於是行去天秀站繼續搭輕鐵, 搭706到天耀轉761P去元朗...起到大棠路站之前, 忽然查到泰衡街有71/72專線小巴經蒙養小學...蒙養小學就起吉慶圍隔離, 比起由錦上路站行去近好多好多...所以即刻起大棠路落左車, 哈哈, 好彩我地都貪新鮮想搭下輕鐵, 如果起天水圍就上左西鐵既話...就蠢啦...呢程車費係($2.1定$2.4?我唔識計, 還望各屯門元朗人指教)
71專線小巴...元朗上車, 起蒙養或之前落車係($4.8), 落車之後向前行一個巴士站既距離就見到吉慶圍
呢類圍村, 就認真悶喇=_=...我知道佢係好耐好耐之前起好, 但係又無人講解, 去到好似戇居居咁, 仲要比3蚊做入場費...
吉慶圍唔算大, 行入去大門口..已經望到盡頭間廟, 左右兩邊既通道比起西環既後巷仲要窄, 應該僅夠一人通過...樓同樓之間既距離...細到呢...大家有睇過無線電視劇都留意到, 男女主角間屋唔知點解係咁近, 近到男女主角一行出窗台已經傾到計...呢個係apply落間屋起隔離, 如果好似飛女正傳入面, 陳豪同蔡少芬間屋, 起對面既話, 按劇情設定佢地只係望到對方而聽唔到對方講乜, 但係起吉慶圍入面, 男女主角(even係住起對面屋), 行出窗台之後, 握握手做個好朋友都得...個距離係細到可以用小學生既間尺黎度...可想而知有幾窄...
比著我就一定唔會揀起呢d咁窄既環境住喇...間屋大還大, 但真係0個私人空間, 除非全屋落窗簾, 否則屋內一舉一動...鄰居就算唔係有心裝你都會睇到曬=.=...
黎到吉慶圍, 已經係我尋晚plan既盡頭...我最多諗埋搭77K可以去到上水回歸紀念園, 但係呢個園exactly起邊真係唔知=_=...出番去泰康圍等巴士, 旁邊果間泰國貨品店竟然有嘩哈哈果汁奶賣...我即刻買左支黎飲XDDD
登上77K($7.3), 行曬成條粉錦公路去到上水...途經粉嶺公路交匯處...我認得果個天橋底下既球場! 係咪殺破狼入面吳京虐殺警察既取景點之一?
"你去歐洲一個月...如果.hsadfwruoiasdfjk;..發生咩事...都唔知點算"
"乜你唔係應該擔心我至係架咩!?"
sor ar XDDDDD
我唔知你原來係一個人去XDDD
咁你小心D啦XDDDD有錢既話我都想跟埋去XDD
因為我都唔exactly知道回歸紀念園起邊, 只知起馬會道, 所以搭到去上水新城路落車, 落車位置都幾準確, 問一問路人就知道紀念園起北區運動場...好近!
留意係回歸紀念園, 而唔係回歸紀念塔, 初頭睇我都比自己fake左, 以為講緊大埔海賓公園果個...後黎上網查下先知...不過呢, 回歸紀念園呢個地方, 個名就好勁, 去到就覺得...wtf!? what am I doing here!? 見到五支類似奧運聖火炬(我覺得似者, 無理由係)連埋一齊, 上面寫住文明威武之師, 成個"園"方圓1000呎左右啦...無啦...其實就係一個好普通既公園, 然後中間擺件藝術品起度, that's it...又係一個...用相片呃人既景點...影相影出黎就正, 親身去睇就...
跟住落黎既地點都係好即興咁揀...
搭東鐵由上水去太和($1.7), 原本我諗住搭64K既...現金付款既話4.7就去到林村, o都八達通就要正價7.3...搞到F起太和唱散左廿蚊張...點知一出黎見到專線小巴25K...($5.1)有得o都八達通, 即刻衝上車
好喇, 問題黎喇, 搭一架唔識既小巴...究竟應該點哎落車呢...其實頭先搭71有呢個問題, 果次就係睇地圖, 見到蒙養小學起錦田公路迴旋處後...所以一過左迴旋處我就識哎落車, 但係呢程...林村許願樹起林錦公路入面...成條直路都唔知點認...好彩呢, 一轉入林錦公路之後就有人哎巴士站有落, 然後第二個站又有人哎巴士站有落...即刻睇下地圖, check到林村公路第三個巴士站放馬莆就係林村許願樹...所以跟住哎巴士站有落...Bingo!
落車果陣F都問我..."你點知點哎落車架?" XDDD
新聞講過原本棵林樹許願樹...因為太多人掟寶碟上去, 重得濟就黎壓死佢, 而家要比棵膠樹大家玩住先...去到我完全feel到棵樹有幾慘....政府用左勁多鐵架支撐住佢...完全睇得切佢係入左深切治療部全身插曬喉既情況...望住佢, 我諗到SHE首他還是不懂, "都是背負了太的心願 流星才會跌得那麼重"...真係好match 許願樹既情況=_=
去到許願樹都天黑喇...開始考驗影相技術, 一入黑...我就一味靠曝光時間長, 開左13秒黎影樹, 當街邊既消防水龍頭三腳架咁用, 係就係影到棵樹ok光, 但係就改變唔到街燈射落去, 搞到棵樹變橙色...街燈太強喇, 我都唔知點set個白平衡可以set番正常=.=
搭番25K($5.1)番去太和站, 搭東鐵去大圍($2.5)...行去車公廟...又一次個站名係fake人既, 我有理由相信由大圍站行去車公廟係近過由車公廟站行去車公廟=__=...八點幾去到車公廟...去到發現車公廟係六點山門=___=去到淨係影門口, 同埋伸個相機入窗, 偷伯入面既景物...
車公廟門口既對聯係好有問題...都唔對既...
2023離開車公廟, 呢個鐘數, 應該要歸家架喇, 不過果時覺得今日咁勁, 一股豪氣湧上心間, 衝口而出: 不如去埋西貢啦!
"你無問題我都無問題"
於是起大圍搭一個站番沙田($1.4), 然後轉299入西貢($9.0)... 途經西沙公路, 唔知點解架車可以chok得咁緊要....=__=差唔多九半先去到西貢
起西貢碼頭影相, 我繼續開盡15秒黎影一張相...我明明set左兩秒後先開始影, 又擺左起個平面上面, 影出黎好似都係有少少震咁既T_T...
其實要去既話呢...仲有得去架...西貢搵92直到志蓮淨苑...不過...廢事啦XDDD起和記食埋飯就番歸喇...
2230登上銅鑼灣小巴, 21蚊, 等到2242先開車, 不過真係好快好快, 2316已經去到渣甸街, 34分鐘only !!! 再轉9蚊西環小巴
落車之後朋友F竟然比番100蚊我做車馬費@_@...原本我都係諗住陪下fd者, 而且一日之內去咁多地方, 搭左咁之前唔識既車我都好開心~!
等我總結下今日搭過既車先...
西環=>10($3.4)=>香港站=>地鐵($5.5)=>青衣站=>308M($6.5)=>青嶼幹線觀景台=>的士(人均$15)=>青衣站=>地鐵($2.4)=>荔景站=>46X($7.0)=>和宜合道=>73x($5.0)=>眾安街=>61M($7.9)=>黃金海岸=>K51($1.8)=>三聖=>K52($1.8)=>龍鼓灘=>K52($1.8)=>蝴蝶輕鐵站=>輕鐵($1.0)=>濕地公園站=>輕鐵($2.1)=>大棠路站=>71($4.8)=>吉慶圍=>77K($7.3)=>上水=>東鐵($1.7)=>太和=>25K($5.1)=>林村=>25K($5.1)=>太和=>東鐵($2.5)=>大圍=>東鐵($1.4)=>沙田=>299($9.0)=>西貢=>小巴($21)=>銅鑼灣=>小巴($9)=>西環
大家可以禁呢度再回顧下我今日條path xddd
今日呢個團認真唔錯, 有好多地方真係唔需要花咁多時間睇, 但係又會想去下, 青嶼幹線觀景台係一例, 一個鐘之內, 咩都睇曬啦, 一個鐘都比多左添; 吉慶圍又係, 聽落好似好有特色...實際我地停留起吉慶圍既時間都唔知有無15分鐘...西貢碼頭我平時見得多啦....不過對於唔係行開山去開離島既朋友黎講應該算係陌生...龍鼓灘又係, 一個鐘左右已經睇夠, 坐得耐都係曬時間...
呢類一日內去咁多個地方既團, 真係幾諗得過wor...應該可以plan多幾個...香港地應該有好多地小地方想去...但係用一日既時間淨係去一個地方, 又好似好戇居咁...所以就要儲埋佢, 一日之內去曬佢!!! 呢個感覺真係爽歪歪XDD
plan個路線...都幾exciting, 搞到我2010_06_16凌晨時份連msn都唔應, 就係發曬癲咁狂揭本乘車指南XDDD, 有咁多個地方, 要搵一條shortest and cheapest path passing through most points with least repetition, 根本就係traveling salesman problem XDDD不過呢, 我會發癲咁搵好明顯唔係因為呢個問題同algorithm design有關...而係呢...發掘路線出黎去match每一pair地方本身係一個好有趣既task, 至少我覺得係...(應該有好多人都唔覺得係=.=)
要plan條route出黎都唔易架, 無乘車指南既話我都唔知點搵到咁多車出黎搵...google map既服務仲未擴展到結合埋公共交通工具, 運輸署整果個又唔好用...期待香港將來有一個local既public transport on9 guide~~~要結合巴士小巴鐵路~!
今日咁樣新界大迴環咁行左一次, 自覺對新界認識又深左
等我隨心諗下新trip先...例如深井燒鵝配流浮山海鮮, 呢個係午餐同晚餐, 去流浮山之前梗係要去白泥啦...又例如馬灣挪ar方舟, 例如...沙頭角!!!搵下點拎禁區紙入去先得...例如錦田樹屋~!米埔啦, 南生圍啦(不過呢兩個地方都唔細=.=)...灣仔姻緣石~!?...廖萬石堂~!? 個景點本身係咪吸引, 係咪好睇唔係重點...重點係想explore下自己既home city者...
打到黎呢度, 有成五千幾字...夠啦=__=應該破左呢度單篇xanga (無copy內容)最長紀錄=.=?
能夠打篇咁長既xanga出黎, 真係要天時地利人和既...16/6係端午節, 公眾假期所以有時間周圍去, 17/6番工, 朝早到晏晝都無野做...成日都起度打xanga=___=...
最後要貼番呢兩張相出黎, 真係正到飛起, 同樣係起濕地公園上面個斜坡影, 一張好灰沉沉, 一張好光明...同一個地方同影出咁大contrast...睇落仲好似幾有意思...正!!!
Recent Comments